РУСКИ КЕРЕСТУР – Тогорочни роботи на обнови, санациї и конзервациї найстаршей рускей хижи почали концом мая, а плановане же буду закончени по штредок авґуста. Проєкт обнови финансує Покраїнски секретарият за културу, явне информованє и одношеня з вирскима заєднїцами зоз 3 милиони динарами, иста сума видвоєна и прешлого року.
Роботи ше окончую под надпатраньом проєктанта спред Покраїнского секретарияту архитекту Єлени Филипович и консултанта др Миряни Дєкич котра ше уж роками анґажує на очуваню руского културного нашлїдства. Виводзач роботох подприємство „Архитектура проинґ” зоз Петроварадину.
Прешлого року у першей часци обнови положене надове закрице, же би ше застановело препаданє, а тераз роботи фокусовани на нукашньосц. Положени нови падлаш, позамасцана и омалтерована нукашньосц и поставени патоси.
З вонкашнього боку од улїци и од сушеда направени нови мурик з валькох, поставени облаки, а у плану ище положиц нукашнї и уходни дзвери. Єдна часц уж и обилєна, а плановане же би ше шицко обилєло на било, лєм же роботи чечу помали понеже ше роби зоз блатом и старима будовательнима технїками котри вимагаю поступносц.
Обнова хижи ше роби по старих фотоґрафийох и записох же би випатрунок бул цо автентичнейши хижи котра була збудована у осемнастим вику. По законченю роботох плановане намесциц хижу зоз старима стварами, же би була як ище єдно туристичне понуканє у валалє.
Найстарша руска хижа у власносци Националного совиту Руснацох од 2016. року, а проєкт єй обнови виробени ище 2012. року у сотруднїцтве з Покраїнским заводом. Под защиту держави є од 1965. року, од 1991. є класификована як културне добро од велького знченя у Войводини, а остатня єй обнова була 1995. року.
