РУСКИ КЕРЕСТУР – Шива цвиклова пипа почала правиц чкоду у паприґи хтора пресадзена на отвореним полю. То чкодлїви инсект хтори напада лєм кед красна хвиля и лєм док рошлїна млада.
Дотераз чкоди од пипи могло обачиц на цукровей цвикли, слунечнїку и кукурици, алє понеже тоти рошлїни тераз уж векши, тераз прегриза млади рошлїни паприґи.
– Вельо пипи маме як директни пошлїдок хованя цукровей цвикли до прешлого року, а гоч того року цвикли єст барз мало, пипа остала и прежимовала у жеми и розмножела ше. Паприґу треба нєпреривно провадзиц, бо пипа прави чкоди велькей розмири, а найактивнєйша є кед дзень цепли. Праве теди треба и третировац з одвитуюцима инсектицидами, бо остаток часу препровадзує под жему, чежко є обачлїва – совитує дипл. инж. аґрономиї Иґор Варґа.