НОВИ САД – Цена за тогорочни род жита ище вше нє позната, а нагадує ше же будзе менша як прешлого року, кеди у одкупу була 16,5 динари, а вєшенї досцигла и 19 динари за килограм.
Аґрономи рахую же би реална цена мала буц 15 динари, цо парастом нєприлаплїве и вимагаю од 18 до 19 дин/кґ. Шицки ше складаю з тим же ше з рока на рок шеє вше менєй жита (прешлого року було 530 000 гектари, а 2015. року 600 000 гектари), и же у тогорочней жатви урожай будзе менши як прешлорочни.
– Уходзиме до жатви з 500 000 тони жита на залихох од влонї. За остатнї штири роки на шветовим тарґовищу вше векше понукнуце жита, та прето ма малу цену, хтору одредзує шветова берза. Терашня цена жита од 15,5 до 16 динари за килограм, а реална 15 динари – гварел директор Здруженя за унапредзенє продукциї и вивозу житаркох и олєяркох „Жита Сербиї” Вукосав Сакович.
У Робних резервох ище нє знаю чи буду одкупйовац жито и по якей цени, о чим одлуча министерства за финансиї и польопривреду, виявел началнїк Одзелєня за поживово продукти у Републичних робних резервох Миломир Ракич и додал же прешлого року одкупйовали лєм кукурицу.
Тиж гварел и же ше обчекує род жита од коло 2,2 милиони тони, односно милион тони менєй як 2016. року, зоз за 20 одсто слабшим рожайим, док Сакович толкує же прешлорочни урожай жита бул рекордни, перши раз бул 5 тони по гектаре, а тогорочни, пре нєвигодну хвилю, длугоку и моцну жиму и мало влаги, нє будзе векши як штири тони по гектаре.
Предсидатель Управного одбору Асоцияциї польопривреднїкох Войводини Мирослав Киш поставел питанє чи приходзи час кед жита будзе лєм за домашнї потреби, гоч би мало буц єдно з важних вивозних продуктох.
– Килограм тогорочного зарна би мал коштац 18-19 динари, а шицко спод тей цени нєприлаплїве за польопривреднїкох, и прето же векшина парастох ма жем под аренду, цо дополнююци трошок.