По законченю єшеньскей часци фодбалского першенства, резултати наших клубох на таблїчкох лєм часточнє задоволююци. Искра на самим верху, од другопласованей екипи сцека пейц боди, а Бачка и Русин з позицийох у верху спадли на сподню половку таблїчкох. Окрем того, пред самим концом и на концу першенства у управох клубох Искри и Русина пременєти тренере и члени управи и Дюрдьовчанє, тиж так наявюю таки пременки.
После перших колох у котрих Искра почала зазначовац прешвечлїви побиди почали роснуц и амбициї бавячох и управи Клуба, та ше ганьблїво почало роздумовац и о тим же Искра и у тей лиґи ма можебуц найквалитетнєйшу екипу и мож роздумовац аж и о Войводянскей лиґи.
Пририхтованя за змаганя у висшим ранґу облапяли оправянє цалей инфраструктури на стадиону и просторийох Клуба. Кед слово о змаганьох плановало ше одбавиц єшеньску часц цо лєпше. По конєц ше указало же анї тота лиґа нє страшна и же ше Искра може ровоправно ношиц и зоз найлєпшима у своєй лиґи.
Гоч Искра полусезуну у Подручней фодбалскей лиґи Суботица закончела на першим месце на таблїчки то нє значи же полусезона прешла без проблемох. У коцурским фодбалским клубу найвекши проблем же ше у прешлей полусезони пременєли двоме тренере, а до ярнєй часци Искра войдзе зоз трецим тренером.
Єшеньску часц Искра почала зоз Здравком Бабичом на лавки як тренером Искрових бавячох. Бабич прешли три роки водзел Искру и то барз успишно, понеже ю уведол до Подручней фодбалскей лиґи у котрей од першого кола зашедла на чоло таблїчки дзе и закончела полусезону, а под його „дириґентску палїцу” страцела лєм два официйни змаганя. Медзитим, Здравко Бабич пре здравствени причини мушел задзековац на функцию котру так успишно окончовал, а у остатнїх трох колох Искру водзел Зоран Шеки Дюрович зоз Вербасу.
– Тренер котри пришол помогнуц у тей нєзавидей позициї, пришол лєм дочасово, понеже вон тренер котри у Вербаше успишно водзи дзецинску школу фодбалу ЦФК, та пре свойо приватни обовязки нє могол буц ришенє на длугши драги. Праве прето, руководство Искри у наиходзацим периодзе, а до початку пририхтованьох, муши пренайсц тренера котри ше годзен цалком пошвециц екипи и предлужиц там дзе станули його предходнїки. Чолни особи ФК „Искра” активно робя же би нашли нового тренера, та и тот проблем пошвидко будзе ришени – гварел предсидатель ФК „Искра” Радослав Сталевич.
У нєшкайших часох финансиї найвекши проблем у каждей сфери живота, та и у спортскей. На перши погляд випатра же Искра тоти проблеми нє ма и гоч финансиї стабилни, проблеми заш лєм єст.
– Понеже ше стредства за финансованє спортских клубох од Општини Вербас по конкурсу одредзую на початку рока, а Искра ше теди змагала у Медзиопштинскей лиґи, достала средства котри ушлїдзели клубом у тим ранґу змаганя. Од єшенї, Искра ше змага у висшей лиґи, у котрей и трошки векши, та розлику муши надополнїц зоз алтернативниих жридох финансованя – наглашел Сталевич.
У 2018. року Искра годна конкуровац за средства котри наменєни фодбалским клубом котри ше змагаю у Подрученй лиґи, та ше у тей обласци будзе „лєгчейше дихац” у наиходзацим року.
По законченю полусезони шлїдзи пауза у котрей ше зведзе рахунки и упечатки у прешлим року, а место на таблїчки вимага озбильни пририхтованя и змоцньованє бавяцкого кадру. Рахує ше на истих бавячох котри тераз у Клубу. Кед же дахто Клуб напущи, як надпомнул предсидатель ФК „Искра” Радисав Сталевич, будзе ше в одзиц рахунку же би ше приведло одвитуюца замена. Хто будзе тренер екипи, будзе ше конкретно знац после схадзки Скупштини Клуба.
НЄИЗВЕСНА ЯР ЗА РУСИН
Нови предписаня у спорту предвидзує проєктне финансованє спортских клубох. Велї финасийни жридла ше нє годно хасновац и раховац на їх помоц. Насампредз, нє годно ше хасновац средства зоз Месного самодоприносу, хтори фодбалером Русина були велька помоц. Законски предписаня у тим смислу очекую помоц од донаторох и спонзорох хторих, нажаль, єст вше менєй.
У тим поглядзе Русин чека нєизвесна ярня часц першенства. Ґу тому би доложиц и кадровски проблеми хтори тей єшенї клуминовали на самим концу першенствених змаганьох.
– Кед слово о Русину, мушим надпомнуц же сом штири роки на функциї тренера. Алє нє лєм то кончим. Так повесц, же сом цали час опарти на самого себе у тей часци роботи. Мушим припознац же сом дакус и вистал. У сезони маме 50 тренинґи, 15 першенствени змаганя и шейсц инши змаганя. На шицких сом бул. Як би ше поведло:случел ше „замор материялу”. Прето сом задзековал на функцию тренера, бо думам же би приводзенє нового тренера „ошвижело” екипу и налєпше пременєло способ бависка. З другого боку мушим надпомнуц же у валалє нєт достаточнє хлапцох хтори би бавели фодбал. Тоти хтори тераз у екипи, велї з нїх нє робя, нє маю стаємну роботу. Скоро шицки маю домашнї обовязки робиц на полю. Вецей раз екипа нє була подполна на змаганьох, та я мушел бавиц. Тоту полсезону зме якошик витримали по конєц. Як будзе нарок, чежко повесц, насампредз же нам вше „цеснєйше” кед слово о финасийох. То ше могло обачиц и у тей часци першенства, бо зме вецей раз мушели сами заплациц дзепоєдни трошки – гварел потерашнї тренер ФК „Русин” Златко Саянкович.
Спрам того, посцигнути резултати на концу єшеньскей часци реални. Лиґа моцнєйша, екипи лєпши. Вироятнє же маю вигоднєши условия у финасийним смислу, а тиж так и у каждим другим.
– Єшеньска часц була нїяка, кед слово о указаних змаганьох. Нєзадовольни сом, бо могло буц вельо лєпше. Бавяче слабо приходзели на тренинґи, а причини за нє приход були нїяки, благо поведзене. У управяцких целох Клуба сом полни єденац роки. Як и тренер Златко можем повесц же пришло по точку же дацо треба меняц. Кед би дахто други пришол на чоло Клуба можебуц би було лєпше. Прето и я задзековал на функцию спортского директора. З другого боку, мушим надпомнуц же кед слово о финансийох вше було цесно. Часто сом зоз своєй кишенки мушел дотирац. Бавячох хтори приходзели зоз страни я мушел виплациц. Пришол час кед вецей нє було важне же як ше бави, алє важне достац пенєжи. Алє, то так кед ше муши привесц бавяча зоз другого места. Найвецей ме розчаровала нєозбильносц бавячох. Чи страца змаганє зоз 6:0, чи менєй лєбо вецей, нє було им важне. Яґод кед би же страцели мотивацию цо ище вецей доприноши нєизвесносци у предстояцих змаганьох на яр – гварел Александар Ковач Берґо хтори по тераз бул на функциї спортского директора ФК „Русин”.
Як надпомнул Александар Ковач, дзепоєдни ришеня ше уж нагадує, та так на место тренера Русина будзе поволани Зоран Маливук зоз Кули. Хто будзе директор, затераз ше нє зна.
ЗАТАЄЛИ ҐОЛҐЕТЕРЕ
Прешлей єшенї фодбалере Бачкей у континуитету дали 68 ґоли цо ище нє призначене у аналох Клуба. У тей сезони резултата иншаки. Одбавели седемнац змаганя, а дали лєм 29. Управа и тренер Клуба, Ґоран Андєлкович, нє скриваю нєзадовольство з резултатом яки посцигли. Як надпомнул тренер Андєлкович, подли єшеньски резултат пошлїдок нє приходу бавячох на тренинґи. Окрем того же нє були досц порихтани за змаганя, даскельо бавяче вецей нє бавя у екипи, а було их вецей и покалїчених.
За початок ярнєй часци управа ФК „Бачка 1923” наявени пременки. Чи потерашнї тренер и далєй будзе на тей функциї, чи будзе нових фодбалерох, укаже ше после отриманей схадзки Скупштини Клуба. На перших ярнїх змаганьох, и перших резултатох укаже ше чи жимска пауза добре вихаснована за пририхтованя. Тиж так будзе видно пременки и у управох наших Клубох. Наздавйме ше же буду адекватни и же найду рецепти за лєпши успих у предлуженю сезони.
ПОДЛА СТАТИСТИКА
Русин од петнац змаганьох од хторих у штирох бул побиднїк, штири одбавел нєришено, а осем змаганя страцел. Бавяче дали 27, а прияли 38, ґоли цо твори неґативни скор од –11. Просеково, на каждим змаганю прияли вецей як 2,5 ґоли.
Подобни резултати направела и дюрдьовска Бачка. На седемнац змаганьох прияли 35 ґоли. Просеково, на каждим змаганю прияли вецей як 2 ґоли. Познавательом фодбалу резултати указую же вельки препущеня направени у пририхтуюцей фази, бо бавяче нє мали моци барнїц ше, а по числу датих ґолох, анї нападац на ґоли процивнїкох. Таки заключеня дали и тренере екипох.
