РУСКИ КЕРЕСТУР – Початком идуцого тижня би требали сцигнуц потвердзеня чи два професийни представи буду участвовац на тогорочним ювилейним 50. Драмским мемориялу „Петра Ризнича Дядї” — поведзене на схадзки Орґанизацийного одбору Мемориялу хтора отримана вчера вечар у просторийох орґанизатора Дому култури.
На поволанку же би участвовал на Мемориялу одвитовал професийни Театер „Александра Духновича ” з Прешова у Словацкей, алє пре поради финансийней природи орґанизатор ище чека їх конєчни одвит.
Пре исти причини тиж ше чека одвит и о госцованю єдного войводянского професийного театру, та од того завиши и конєчне число тогорочних представох и їх розпорядок през днї Мемориялу хтори, як познате, будзе отримани од 16. по 24. марец.
Як орґанизатор сообщел, на Мемориял нє приходза драмски аматере з КУД „Яким Гарди” з Петровцох понеже ше им нє удало пририхтац представу, розпатра ше участвованє ище даєдней представи, а сиґурне же на тогорочним Мемориял буду участвовац аж седем дзецински представи.