НОВИ САД – Министер просвити, науки и технолоґийного розвою Младен Шарчевич и директор Канцелариї за управянє з явнима укладанями Марко Блаґоєвич вчера, 2. марца, у Новим Садзе бешедовали з предсидательом Покраїнскей влади Иґором Мировичом о укладаньох до установох образованя на териториї Войводини.
Здогадуаци же покраїнски власци прилапели тророчни план обнови основних и штреднїх школох, Иґор Мирович предложел же би ше запровадзело ефикасни механїзем сотруднїцтва и черанки информацийох медзи покраїнскима орґанами, Министерством и Канцеларию за управянє з явнима укладанями, пре ефикаснєйшу обнову школох.
Министер Шарчевич потримал идею и визначел же Министерство уж ма интензивне сотруднїцтво зоз спомнуту Канцеларию, же би ше знало приоритети и плани обнови обєктох, а Блаґоєвич на схадзки бешедовал о потребней проєктней документацї за плановани роботи.
План заєднїцкей обнови образовних установох догварени на схадзки Републичней и Покрїнскей влади уж започал, и за менєй як тидзень почала обнова трох школох – у Пландишту, Вербаше и Ґосподїнцох.