РУСКИ КЕРЕСТУР – Коцурске здруженє младих „КУМ” у рамикох свойого проєкту „Желєна школа” школяром рускокерестурскей Школи подаровало 100 младнїки лїковитей рошлїни мелиси.
Школяре нїзших и висших класох основней школи, як и ґимназиялци вєдно зоз педаґоґиню Школи Любицу Няради и учительку Наталию Зазуляк посадзели рошлїни у дворе хижи котру за свойо потреби хаснує Туристичне здруженє „Руски Керестур”.
КУМ-ово активисти у рамикох того проєкту тримали едукативни роботнї з еколоґийнима темами у школох у Футоґу, Бачкей Тополї и Руским Керестуре. У Руским Керестуре циклус закончени зоз штирома роботнями концом мая.
Проєкт „Желєна школа” ше реализує у сотруднїцтве з Привредну комору Сербиї и Розвойну аґенцию Австриї котра и його финансиєр. Дзекуюци тому проєкту, на розчисценей депониї при рускокерестуркому теметове Здруженє спортских рибарох „Коляк” посадзело 200 младнїки древох пауловниї.
