РУСКИ КЕРЕСТУР – Школярка рускокерестурскей Ґимназиї Ясна Медєши успишно закончела ЛТС обуку за камп-лидерку у орґанизациї Младих виглєдовачох Сербиї, на семинаре хтори од 16. по 19. юний отримани у Еколоґийним центре у Сримских Карловцох.
Ясна була медзи петнац учашнїками на тей обуки з цалей Сербиї, и вєдно з колеґом зоз Шпаниї того року будзе предводзиц Волонтерски камп у Руским Керестуре и камп у Обедскей бари.
Волонтерски камп у Руским Керестуре, з назву „На двох колєсох”, будзе од 25. юлия по 5. авґуст, гварела за Рутен Ясна, а у Обедскей бари од 20. авґуста по 2. септембер, хтори пошвецени охрани защицених и загрожених файтох птицох.
Орґанизация Млади виглєдоваче Сербиї член Медзинародней волонтерскей орґанизациї (IVS – International Voluntary Service) понука можлївосц лидерства у коло 1 000 волонтерских кампох по цалим швеце. Идуцого року Ясна будзе „старши лидер волонтерских кампох” зоз здобутим сертификатом, та планує пойсц и на даєден камп у иножемстве.