ВРОЦЛОВ (ПОЛЬСКА) – На поволанку Институту славянскей филолоґиї Вроцловского универзитету у Польскей, акадамик Юлиян Тамаш од 3. по 6. април отримал осем преподаваня студентом и їх професором о рускей (русинскей), українскей и южнославянских литературох, а з рамикову тему „Погляд in medias res на литератури Балкану, Войводини и штреднєй Европи”.
Академик Тамаш у Вроцлове, у универзитетским центре Шльонского войводства (универзитет основани пред 300 роками) у мултинационалним и мултиконфесийним центре, дзе ше врацело и значне число Лемкох виселєних у Операциї „Висла”, преподавал по українски и по сербски.
Як Рутенпрес дознава од академика Тамаша, Институт славянскей филолоґиї у Вроцлове за идуци школски рок уписує студентох за штредньоевропски, українскобогемистични и українскоюжнославянски студиї, так же його преподаванє источашнє було и пилот-викладанє, понеже би од єшенї на Вроцловским универзитету мал буц и стаємни професор українистичних, лемковскорусинистичних и южнославянских литературох.