КОЦУР – У Коцурским хотаре концом прешлого тижня почала жатва сої, хторей вигодна хвиля у тей сезони окреме одвитовала. Сою ше у валалє одкупює на трох одкупних местох, а цени варираю.
Гоч ище вчас за одредзованє штреднього урожаю, од парастох, а и од фаховцох, Рутенпрес дознава же соя добре зродзела. У коцурскей Роботней єдинки „Либела продукту” того року за сою уведзена терминске предаванє, та цена сої кажди дзень иншака. Вчера аконтна цена була 36 динари, а як конєчна понукнута 40 динари за килограм.
Землєдїлска задруґа „Класка” понука аконтну цену од 32 динари, док конєчна будзе позната познєйше. У маґазину подприємства „Фарм кооп” тиж почал одкуп сої, а аконтна и конєчна цена вчера були исти як у „Либела продукту”.
Нагадованє же жатва сої будзе закончена релативно швидко. Попри уж дозретей, у коцурским хотаре єст надосц и посцернянковей сої, хтора тиж добре напредовала и будзе скошена познєйше.