БЕОҐРАД – Колумниста дньових новинох „Данас” Алексей Кишюгас з Нового Саду добитнїк тогорочней новинарскей награди „Сташа Маринкович”, хтору традицийно додзелюю новини „Данас”.
Як пише вчерайши „Данас”, одлуку о добитнїкови тогорочней награди окремни жири, у хторим були Драґана Маринкович (супруга Сташу Маринковича), новинарка Ґордана Суша, прешлорочни лауреат Зоран Кесич, редакторе у „Данасу” Ясмина Лукач и Ивана Матиєвич, перши главни редактор Ґруїца Спасович и терашнї главни редактор тих новинох Драґолюб Дража Петрович, як предсидатель жирия, принєсол вовторок, 7. юния.
У конкуреницї за тоту престижну новинарску награду були коло 20 предложени новинаре, а попри Кишюгаса, у узшим виборе були и редактор КРИК-у Стеван Дойчинович, та редакторка на РТВ Войводини Марина Фратуцан.
к визначує „Данас”, Алексей Кишюгас єден з облюбених колумнистох тих новинох, праве тот пре котрого ше, медзи иншим, „Данас” чита и купує. „Нєнадрилююцо, алє прецизно, дошлїдно, тирвацо и нїяк пристрасно пише Кишюгас з тижня на тидзень тексти на актуални теми” – гвари вчерайши „Данас”.
„Алексей Кишюгас антифашиста, професор, социолоґ, новинар котри нам зоз совершеним академским, а источашнє прилапююцим способом, виношаци при тим свойо становиско и опредзелєнє, нєдвосмислово кажди викенд ознова толкує швет и нас самих” – пише „Данас”.
Награда Кишюгасови будзе уручена нєшка, 9. юния, на шветочносци з нагоди Дня новинох „Данас”.
Награду „Сташа Маринкович” ше додзелює од 1993. року, перше ю додзеловали дньово новини „Борба”, потим „Наша Борба”, а од 2000. року награду додзелюю дньово новини „Данас”.