НОВИ САД – Помоцнїк покраїнского секретара за енерґетику Драґан Будошан наявел вчера же Секретарият поруша инициятиву за утвердзованє учасци Войводини у Електропривреди Сербиї (ЕПС).
Будошан за РТВ потолковал же основа за таку вимогу нєдавне гашенє Електровойводини и єй приключованє до ЕПС-у.
– На основи тей одлуки Войводинама право вимагац утвердзованє своєй учасци у вкупним маєтку ЕПС-у – гварел помоцнїк ресорного покраїнского секретара.
Будошан додал же маєток Електровойводини стваряли гражданє Войводини и же войводянска администрация дзвигала кредити и задлужовала ше за будованє електро-енерґетскей системи у Покраїни.
Вон поручел и же то нє политичне питанє и нє мало би завишиц од того хтори странки на власци у Покраїни.
Як гварел Будошан, задаток Покраїнскей влади хранїц интереси гражданох Войводини, а утвердзованє часци їх маєтку у ЕПС-у вшелїяк у интересу каждого граждана.