КОЦУР – Шаховски клуб (ШК) „Омладинєц”, хтори ше уж коло 10 роки змага у Войводянскей лиґи, ґрупа Бачка, прешлого року завжал 2 место и уж длугши час є найуспишнєйши шаховски клуб у општини, остал без финансийней потримовки Општини Вербас.
Клуб без финансованя остал понеже на конкурс за финансованє спортских клубох Општини Вербас, з Клубу придали стари, прешлорочни формулари, хтори ше и тераз находза на сайту Опшини, а на хторих нє пише же су нєважаци.
По словох предсидателя Клубу Янка Бесерминя, нє обвисцени су же отворени нови сайт, на хторим и нови формулари, а на конкурсу су одбити без ришеня, обгрунтованя и без права на жалбу.
После вецей розгваркох з компетентнима задлуженима за спорт, у вербаскей оптштини поведзене же Клуб нє ма право на жалбу, же одлука конєчна и же у тим року з Општини нє достаню средства за функционованє ШК.
Клуб примушени з других жридлох назберац пенєж за порядну роботу, до чого спада и реґистрация Клубу, котизация, плаценє рейтинґ-такси, трошки судийох и змаганьох, та модлї шахистох и любительох шаху же би ШК „Омладинєц” виратовали од завераня и помогли кельо можу.
Шицки котри жадаю помогнуц, средства можу уплациц на жиро-рахунок: Банка Интеса, 160928086-09 за ШК „Омладинац”