Бависка буду и того року

автор а. паланчанин
311 Опатрене

ДЮРДЬОВ – У просторийох дюрдьовского Културно-уметнїцкого дружтва „Тарас Шевченко”, внєдзелю 16. януара, отримана Рочна схадзка Скупштини Спортского здруженя Спортских бавискох „Яша Баков”. На схадзки присуствовали члени Скупштини и представнїки Руского културного центру зоз Нового Саду, зоз Шиду, Миклошевцох и Петровцох (Република Горватска), Коцура, домашнї схода зоз Дюрдьова и Папивинґ-у  зоз Вербасу.

После процедуралних точкох, предсидатель Бавискох Иван Папуґа поднєсол Звити о роботи, як и Финасийни звит за прешли рок. Спрам винєшених податкох, прешлого турнирского року, без огляду на финансийни почежкосци и на реални стан пре Ковид-19, отримани 16 екипни и 8 поєдинєчни змаганя.

Кед слово о финансийох, єдини прилїв средствох у прешлим року бул од котизацийох на турнире, змаганю у вареню пасулї. Орґанизаторе ше у прешли, року мушели ище баржей операц на власни способносци же би обезпечели нєобходни средства. Но, спрам билансу хтори на схадзки презентовани, у каси остало 80.737,13 динари. Тот пенєж преруцени за тот рок. Од тих средствох 10.000 динари ше муши охабиц кед ше дойдзе по хвильку кед ше вецей нє годни орґанизовац Бависка за їх гашенє. То опция хтору нїхто нє жада, алє вона ище вше валидна, як поведзене на схадзки.

Пре почежкосци и законски предписаня тот рок будзе за Бависка ище рестриктивнєйши. Прето на схадзки Скупштини єдногласно прилапени одлуки шпорованя у тим року, а одноша ше на трошки хторих нє муши буц. То насампредз нєвиплацованє драгових трошкох за членох Управного и Надпатраюцого одбору. У тим року ше змагательом буду додзельовац лєм припознаня, а металиї достанє лєм змагателє на поєдинєчних турнирох.

На схадзки часточнє порадзени термини и места отримованя турнирох у рамикох СБ „Яша Баков” за тот рок. У Дюрдьове ше отрима змаганє у кошарки „3 на 3” (марец), турнир у шаху будзе у Петровцох (Р. Горватска) лєбо и Шиду (у зависносци од мирох безпечносци пре пандемию) концом юлия лєбо на початку авґуста. За юний, лєбо септембер плановане же будзе отримани турнир у малим фодбалу за ветеранох у Коцуре, за початок априла плановани турнир у столним тенису у Шиду. Авґуст лєбо септембер мешаци кед плановани турнир у малим фодбалу „3 на 3”. У октобру би требал буц отримани турнир у ґуґланю и штреляцтве у Вербаше, а за децембер плановани турнир у пикаду у трох конкуренцийох у Новим Саду.  

ПОВЯЗАНИ ТЕКСТИ