НОВИ САД – Покраїнска влада уручела контракти о доставаню безповратних средствох за здруженя гражданох з териториї Войводини, по конкурсох за реализованє проєктох з обласци туризму, та за розвой и ревитализацию уметнїцких и старих ремеслох.
Медзи здруженями хтори достали средства и керестурска „Байка“ и кулска „Идея“, дзе „Байки” за проєкт „Стари ремесла” на тим конкурсу опредзелєни 120 000, а „Идеї”, за проєкт з истим насловом 70 000 динари. Контракти подписали предсидательки спомнутих здруженьох – „Байки” Славица Катона и „Идеї” Серафина Бики.
З нагоди подписованя контрактох, покраїнски секретар за привреду, обезпечованє роботи и ровноправносц полох Мирослав Васин гварел же здруженя за остатнї два роки вельо допринєсли розвою туризму у Войводини.
– Нєшка туризем найпрофитабилнєйши привредни конар у Войводини, а прешлого року ше перши раз случело же приходи од туризму векши як 200 милиони еври. У перших пейцох мешацох число нащивительох за 15,8 одсто векше у одношеню на исти период 2014. року, а праве и хаснователє средствох за хтори тераз подписани контракти, вельо доприєсли розвою туризму – гварел Васин.
