Традицийни бал Фодбалского клубу „Русин” отримани 16. януара. Бул добре нащивени, були госци зоз Кули, Коцура, Лалитю… На балу преглашени найлєпши фодбалер ФК „Русин” у прешлим року – Деян Павлович.
За найгласнєйшого навияча, з тей нагоди преглашени Иґор Няради Ґойо, хтори влонї нє препущел анї єдно Русиново змаганє.
Найлєпши фодбалер ФК „Русин” у прешлим року – Деян Павлович
Як и каждого року потераз, на балу була богата томбола. Предати пейцсто томболи, а було аж сто награди. Найвреднєши награди пошли до Коцура, а єдна остала у Руским Керестуре.
Окрем тей финасийней потримовки од спонзорох, Дружтво Руснацох зоз Канади Русинови послали 600 канадски долари. Донацию од наших краянох зоз Канади, як управа наглашела, ше похаснує за реновиранє зоблєкальньох на Ярашу. Роботи почню накадзи будзе хвиля красша.
Русиновци обецали же потримовку донаторох, окреме зоз Канади, оправдаю у ярнєй часци першенства зоз ище лєпшима резултатами яки були у єшеньскей часци.
Пририхтованя за идуце першенство почали 4. януара на Ярашу. Тренер Златко Саянкович з тей нагоди надпомнул же ше тренинґи отримує комбиновано – єдну часц ше отримує у Спортскей гали, а другу на стадиону. Планує ше одбавиц шейсц приятельски змаганя.
У предходним терминє, Клуб напущел Боян Бранкович, хтори прешол бавиц за екипу ФК „Задруґар” зоз Сербского Милетичу. До Клубу ше врацели млади фодбалере: Стефан Бранкович, Александар Кочиш и Андрей Малацко.
Ярня часц першенства у Подручней фодбалскей лиґи Зомбор почина 13. марца.
[/vc_column_text] [vc_column_text pb_margin_bottom=”no” pb_border_bottom=”no” width=”1/1″ el_position=”first last”]
ДОБРИ РЕЗУЛТАТИ ПИОНИРОХ
Найефикаснєйши у екипи пионирох бул Стефан Кочиш
У Медзиопштинскей фодбалскей лиґи за пионирох (2001. рок) Кула–Оджак, Русин у єшеньскей часци, як сениорска екипа, добре бавел. Бавели дзевец змаганя од хторих у шейсцох славели побиду, єдну бавели нєришено, а два страцели. Ґолґетере були ефикасни, бо витворени скор бул 34:19, а найефикаснєйши бул Стефан Кочиш, хтори дал 28 ґоли. У Екипи були: Филип Тома, Микола Папуґа, Виктор Микита, Борис Югик, Доменик Стрибер, Александар Гарди, Алекса Шайтош, Матей Саянкович, Стефан Кочиш, Деян Надь, Алексей Джуджар, Неманя Стойков, Желько Виславски, Тони Пашо. Тренер пионирскей селекциї Русина, Борис Шайтош.
[/vc_column_text] [vc_column_text pb_margin_bottom=”no” pb_border_bottom=”no” width=”1/1″ el_position=”first last”]
ҐОЙО НАЙГАРЛАТШИ И НАЙВИРНЄЙШИ
Иґор Няради вирни навияч ФК „Русин” и ФК „Червена гвизда” зоз Беоґраду одмалючка.
– Провадзим шицки змаганя Русина хтори бави и дома и на госцованьох. Мушим надпомнуц же Русин ма вирних навиячох хтори часто численши од навиячох домашнього клубу. У єшеньскей часци першенства дзелєл треце и штварте место на таблїчки, алє ше наздавам же у ярнєй часци зоз потримовку вирних навиячох будзе лидер на таблїчки. Диплому, хтору сом достал як припознанє за найгарлатшого навияча ми окреме мила и уж сом часцел моїх пайташох зоз Русиновей навияцкей ґрупи „Дзиви швинї”, як и колеґох на роботи – гварел Ґойо зоз одушевийом, а преноша „Вечарши новосци”.
Иґор Няради вирни навияч ФК „Русин”
[/vc_column_text]