РУСКИ КЕРЕСТУР – Полицає з Полицийней станїци Кула вчера у Основней и штреднєй школи з домом школярох „Петро Кузмяк” школяром отримали преподаваня о рижних файтох безпечносци – у транспорту, у школи, на улїци и дома.
У рамикох акциї „Матуранти 2016”, Радован Вєштица зоз Сектору за контролу транспорту штредньошколцом закончуюцих класох бешедовал о безпечносци у транспорту и винєсол податок же млади вожаче у першим року доставаня вожацкей дозволи спричиня, лєбо су учашнїки коло 1 500 транспортних нєщесцох. Найчастейши причини нєщесцох швидке воженє, конзумованє алкоголу и наркотикох, гварел Вєштица.
Матуранти пробовали и ткв. „пияни окуляри”, хтори, кед ше их положи, указую перцепцию яку маю пияни, лєбо дроґирани особи, та млади видзели як под дїйством алкоголу и наркотикох погубени смисел за ровновагу и перцепцию.
Школяром пиятих класох Основней школи кулски школски полицає Драґан Кежич и Душан Шарац отримали преподаванє о насилстве и його формох: физичней, сексуалней, емоцийней и психичней, електронскей и других, та указали як мож препознац насилство и потенциялних насилнїкох.
Преподаванє отримане же би ше дзецом приблїжело роботу полициї, посовитовало як ше маю справовац кед думаю же су загрожени и од кого питац помоц.