Було цесно у загради ресторана „Милениюм” на побрежю рики Студви у Моровичу при Шиду, прешлей соботи, 1. авґуста, дзе ше отримовала традицийна манифестация „Етно-дзень” у орґанизациї Здруженя женох „Моровичанки”. На декорованих штандох були виложени стародавни єдла, лакотки и ручни роботи здруженя женох зоз тей часци Сриму.
Попри других, присуствовали и Здруженє женох „Бикичанки”, Здруженє женох „Радосц” з Бачинцох, „Жридло” зоз Беркасова, потим здруженя зоз Шиду и других местох – Раковцу, Купинову, Латярку, Врнячкей Банї, Мартинцох, Черевичу… а єдно здруженє було и зоз Дворох при Биєлїни у Републики Сербскей. Орґанизаторе дали задаток же би жени порихтали за змаганє домашнї хлєб, ґомбовци приготовели на рижни способи, а вибрана и найкрасша представнїца женох.
За найлєпши хлєб преглашени хлєб хтори виложели жени зоз Здруженя „Мац Анґелина” з Купинова, а вони мали и найкрасшу представнїцу.
По оцени жирия найлєпши ґомбовци порихтали жени зоз Здруженя женох „Бикичанки”. Як нам гварела Невенка Бобаль, предсидателька „Бикичанкох”, ґомбовци були з ґризом, помишаним з муку у цесту, хторому додати два-три вайца. Гевто цо була „тайна смаку” то шлївка хтора кед ше пререзала давала аж три фарби, а ґомбовци звичайно були пошулькани до презлох и цукру у кристалу.
На самим початку манифестациї наступели и члени КУД „Босут” з Босуту хтори ше представели з танцами зоз Сербиї и Сриму.
Єлена Уйвари спред орґанизатора нам гварела же є подполно задовольна з одволаньом здруженьох женох и же то була єдна удатна манифестация.