РУСКИ КЕРЕСТУР – Всоботу, 7. новембра, у спортскей гали у Руским Керестуре отримани вецей рукометни змаганя за младших и старших рукометашох и за рукометашки.
Перше бавена Лиґа младих катеґорийох рукометашох у хторей участвую штири клуби – керестурски Русин, Приґревица, Зомбор и Червинка з истомених местох, Ґрафичар з Бездану, та Зомборелектро зоз Зомбора. Бави ше по турнирскей системи, а єдно з условийох за участвованє же мож бавиц у завартим, односно у спортскей гали.
На трецим таким турниру у тей лиґи млади рукометаше Русину всоботу бавели два змаганя и обидва страцели – од Приґревици з 13:9, а од екипи Зомборелектро зоз 19:12. Найефикаснєйши на обидвох змаганьох у Русину бул Филип Тома, котри посцигнул 5 ґоли.
Рукометашки Русину всоботу зазначели свою другу побиду у тогорочним першенстве у Трецей рукометней лиґи Сербиї – Срим-Южна Бачка, понеже з 23:21 победзели Милетич з Мошорину. Найвецей, по 5 ґоли, за Русин посцигли Сабина Планчак, Настася Надь и Мая Варґа.
Успишни були и рукометаше першей екипи Русину, котри всоботу у першенственим змаганю у Бачкей рукометней лиґи з 29:22 победзели Борец з Бачкого Ґрачцу. Найвецей ґоли за Русин дали Хома 9, Гербут 8, Салак 5 и Боянович 4. По конєц єшеньскей часци першенства Русин бави ище єдно змаганє.
