КРИЖЕВСКЕ ВЛАДИЧЕСТВО – У сримских парохийох Крижевского владичества у Горватскей грекокатолїцки вирни по руских местох Вельку ноц преславюю по новим календаре, так же у Страсним тижню нєшка Желєни штварток, а на ютре Вельки пияток, кеди и строги пост.
У Петровцох, у церкви Покрова Пресвятей Богородици о. Владимир Седлак нєшка на 17 г. будзе служиц Службу на спомин Тайней вечери и Вечурню. На Вельки пияток покладанє плащанїци до Божого гроба будзе на 15 г., а на соботу Всеночне и Пасхална утриня на 20 г.
Миклошевски вирни Вельки штварток означа у церкви Рождества пречистей Дїви Мариї зоз Службу на чесц Тайней вечери на 19 г., a на Вельки пияток парох миклошевски и викар сримско-славонски о. Яким Симунович на 16 г. будзе служиц Вечурню з покладаньом плащанїци. За духовни потреби и молитви при Божим гробе церква будзе отворена до 21 годзин. На Вельку соботу Служба Святого Василия Велького и Воскресна утриня будзе на 20 г., а на 21,30 почнє процесия з обходом коло церкви.
У Вуковаре, у церкви Христа Царя Служба на спомин Тайней вечери нєшка будзе на 19 г., а парох вуковарски и декан сримски о. Владимир Маґоч на Вельки пияток на 7 г. будзе служиц Утриню з читаньом Євангелийох. Вечурня з покладаньом плащанїци у Вуковаре будзе на 16 г., на Вельку соботу на 7 г. Єрусалимска утриня, а на 18 г. Вечурня з обходом коло церкви.
У грекокатолїцкей церкви Христа Царя у Осиєку, у каплїчки шестрох Василиянкох, нєшка, на Вельки штварток на 16 г. будзе Служба Божа з Вечурню, а на 20 г. Страсна Утриня з читаньом 12 Євангелийох. На Вельки пияток на 16 г. будзе Вечурня зоз Исусовим хованьом и викладаньом плащанїци, а на 20 г. Єрусалимска утриня. На Вельку соботу на 16 г. будзе Вечурня зоз Службу Божу, а то и тиж нагода же би ше вирни поклонєли и дотхли плащанїцу.
У каплїчки Воздвижения Чесного Хресту у Винковцох на Вельки пияток на 15 годзин о. Владимир Мудри будзе служиц Вечурню з покладаньом плащанїци.