НОВИ САД – На новосадским Рибарским острове, 2. и 3. юния отримана реґионална Конференция „Моя кравичка Фуд Ток 2016”, штварта по шоре, хтору орґанизує Колор Прес Ґрупа. Окрем фаховцох з обласци орґанскей поживи, сомелиєрства, маркетинґу и туризма, на Конференцию присуствовали и велї особи з явного живота.
Член Городскей ради за привреду Городу Нови Сад Ґоран Сечуйски визначел же пришол час за ґастрономски туризем хтори мушиме розивац, бо маме вельо потенциялу. Ґу тому, брендовани продукти и орґанска продукция поживи маю стратеґийне значенє за будучносц.
На Конференциї бешедовала и амбасадорка Французкей у Сербиї Кристин Моро, котра здогадла на наставанє, ширенє и уплїв французкей кухнї у швеце.
Конференция мала пейц панели на хторих ше анализовало нови тренди у кулинарстве, о тим хто нєшка ходзи до ресторанох, як треба продуковац орґанску поживу, цо єст нове у цукрарстве и о нових продуковательох вина на тих просторох.
Домашнї тогорочней Конференциї бул познати водитель Оливер Млакар, а єден з медийних партнерох Конференциї була и НВУ „Руске слово”.