РУСКИ КЕРЕСТУР – На соботовей схадзки Националного совиту (НС) розпатрана и информация о можлївосци снованя музейней збирки Руснацох, а о дотерашнїх роботох на планє очуваня нашого скарбу, як и з евентуалнима крочаями потребнима за снованє збирки, Совит упознала кустох у Музею Войводини Любица Отич.
Як позитивне Отичова визначела поробене на зазберованю, очуваню, класификованю и каталоґованю скарбу у Дюрдьове и Коцуре, дотерашнї и будуци проєкти Заводу за културу войводянских Руснацох на тим планє, алє спозорела же би подобни роботи требало окончиц и у Руским Керестуре и других наших местох, у напряме снованя музейней збирки Руснацох бо, як наглашел и член Совиту Сашо Сабадош, стан у очуваню нашого скарбу алармантни.
И Отичова и члени НС роздумовали о питаню же хто будзе снователь музейней збирки, финансиєр, хто ше о нєй будзе старац, а у складзе зоз строго одредзенима законскима предписанями, и заключене же окремна роботна ґрупа будзе бешедовац у Покраїнским секретарияту за културу и явне инормованє о можлївей драги за снованє музейней збирки Руснацох.