НОВИ САД – Подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михаль Нїлаш вчера отримал конференцию за новинарох, на хторей сумировал 2014. рок.
– Шицки бизме любели лєм по успихох паметац рок за нами, алє нажаль, тот рок бул рок моцних политичних и финансийних турбуленцийох, хтори просвиту приведли до єдного з найрадикалнєйших штрайкох – гварел Нїлаш.
Вон визначел важнєйши проєкти Секретарияту у образованю у тим року, як цо то орґанизованє штвартого „Фестивалу мудросци”, хтори бул нагода за афирмацию младих.
З ребалансом покраїнского буджету видвоєни 70 милиони динари за набавку сучасней опреми до школох и домох школярох, так же того року опремени 124 штреднї школи и 16 доми и створени лєпши условия за образованє, наглашене на конференциї.
Бешедоване и о укладаньох до обласци службеного хаснованя язика и писма, дзе за розвой системи електронскей управи и оспособйованє занятих за роботу у вецейязичних штредкох уложени 9,5 милиони динари, а финансоване и виробянє и поставянє вецейязичних таблох, друкованє вецейязичних формуларох и явних публикацийох.
Єден з найактуалнєйших и найзначнєйших проєктох Секретарияту то „Инклузия ромских школярох у штреднїх школох у Войводини”, хтори тирва од 2007. року, а оценєни є як найквалитетнєйши у реґионє.