Вандализем на керестурским базену

автор сен
1.1k Опатрене

РУСКИ КЕРЕСТУР – Вноци з пиятку на соботу, за тераз нєпознати вандалє насилно погубели векшину столох на базену и лавочки коло нїх, а потим даєдни аж и запалєли. Од седем ґарнитурох столох и лавочкох, кельо члени Здруженя рибарох „Коляк” и други Керестурци направели и положели пред даскельо роками, тераз остал лєм єден стол и даскельо лавочки.

Лавочки и столи рокaми отримовали векшином рибаре, алє и други людзе з валалу, та гоч дакеди и було поламани лавочки, нїґда то нє було зробене на таки способ, гварел член Еколоґийного руху „Желєни персцень” Владимир Бучко. Гоч их того року плановали обновиц и ошвижиц, тераз повинїмаю тото цо остало.

– Треба реаґовац на таки вандализем, бо кед нїхто нє будзе одвитовац, так будзе и зоз шицким надалєй. Наявене же на базен буду положени лавочки з дзецинского парку, та треба предпоставиц же ше, кед нє будзе нїякей реакциї, збудзе исте як и зоз старима – гвари Бучко.

Окрем губеня лавочкох и столох, активисти „Желєного персценю” и „Коляку” ше поносую и же дотераз поламани вецей як 40 древка хтори посадзели вяри, а то нїхто нє контролує. Бучко наявел же на єшень знова орґанизую садзенє древкох.

ПОВЯЗАНИ ТЕКСТИ