НОВИ САД – Стреду, 25. новембра, Покраїнска влада принєсла Одлуку о формованю Интерсекторского одбору хтори будзе координовац, провадзиц и оценьовац ефекти мирох хтори ше запровадзує у рамикох покраїнскей Програми процив насилства над женми.
З нагоди означованя Медзинародного дня борби процив насилства над женми, з Покраїнского секретарияту за привреду, обезпечованє роботи и ровноправносц полох здогадли же насилство над женми потупйованє люских правох и найтраґичнєйши и найексплицитнєйши є указатель родней нєровноправносци.
По податкох Покраїнского омбудсмана, 2014. року у Войводини до полициї придати 7 098 вимоги за интервенцию у случайох насилства у фамелиї. Судска пракса указала же у 66,7 одсто случайох насилства у фамелиї виновна приява одруцена, найчастейше пре нєдостаток доказох.
Резултати виглєдованя о розширеносци насилства над женми у Войводини указали же кажда друга дожила психичне, а кажда 34. жена церпи физичне насилство. По податкох Мрежи „Жени процив насилства”, того року у случайох насилства у фамелиї забити 8 жени, а у векшини случайох насилнїк и пред тим бул приявени одвичательним институцийом.
З ресорного секретарияту за витворйованє мирох з Програми процив насилства над женми того року видвоєни 7 милиони динари, хтори уложени до даваня фаховей помоци у случайох насилства, обуки за занятих у институцийох хтори задлужени за проблем насилства, конкурсох за економске змоцньованє женох котри жертви насилства и подобного.