Вецей процив, як за приватизованє медийох

автор ртп
1k Опатрене

НОВИ САД – У Скупштини Войводини вчера отримана конференция о меншинским и вецейязичним информованю у контексту запровадзованя актуалних медийских законох. Представителє меншинских медийох, покраїнскей администрациї и институцийох, та представителє медийних здруженьох розпатрали пошлїдки виходзеня держави з власнїцтва над медиями, як и шансох таких медийох у тарґовищних обставинох и проєктним финансованю.

Повторене же покраїнска администрация и национални заєднїци од початку спозорйовали на ризик приватизованя меншинских медийох.

Представителє Новосадскей новинарскей школи представели дотерашнї биланс, дзе виходзи же вецей медиї препадли, лєбо су у процесу гашеня, як цо успишнє робя у новим власнїцтве. Институция Покраїнского омбудсмана арґументовано представела нєдоповедзеносци законскей реґулативи у медийней сфери, хтора окреме загрожує информованє у меншинских заєднїцох. З другого боку, Нєзависне дружтво новинарох Войводини (НДНВ) акцентовало модели як вихасновац нагоди у нових обставинох, насампредз кед слово о медийох цивилного сектору.

У дискусиї доминовал упечаток же анї єден з обчекованих цильох приватизованя медийох – нєзависне информованє и исти уловия на конкурсох – нє витворени. З єдного боку, праве приватни друковани и електронски медиї емитую змисти хтори проблематични по професийних и етичних стандардох, а з другого боку, у дзепоєдних локалних штредкох на нїби транспарентних конкурсох скоро шицок предвидзени пенєж достали медиї чий нови власнїк ма вязи з политичнима структурами на власци.
Дотерашнї розлични становиска на тот завод ище и преглїбенши, насампредз през полемику о мотивох прецо єдна страна стриктно за, а скоро шицки други процив приватизованя меншинских медийох.

Конференция отримана у орґанизациї НДНВ, як часц проєкту хтори потримую Амбасада Голандиї, Покраїнски секретарият за културу и явне информованє и ОЕБС.

Спред рускей заєднїци на конференциї були предсидатель Одбору за информованє Националного совиту Руснацох Иван Сабадош, директорка НВУ „Руске слово” Мартица Тамаш, як и Яким Винаї з Информативно-пропаґандного центру Кула, спред локалних медийох по руски

ПОВЯЗАНИ ТЕКСТИ