БЕОҐРАД – Скупштина Сербиї вчера прилапела виманки и дополнєня Закона о полициї, з хторима полиция нєстату особу почнє глєдац такой по приявйованю єй нєставаня. Закон у народзе познати як „Тиянов закон“, а його применьованє почина уж нєшка.
Зоз Законом утвердзене же полиция вєдно з одвичательнима орґанами, здруженями гражданох и гражданами такой муши превжац мири за пренаходзенє особи, хтори предвидзени зоз законами.
З новим законом предвидзене и творенє Дирекциї полициї, а утвердзене и же специялна єдинка полициї то Специялна антитерористична єдинка. Окремни єдинки полициї то Жандармерия, Єдинка за обезпечованє особох и обєктох, та Геликоптерска єдинка, а у Полицийней управи за Город Беоґрад то Полицийна бриґада. Ґу тому, одлучене же Процивтерористична єдинка и Специялна терористична єдинка буду обєдинєни до єдней.
По нових одредбох Закона, полицає ше годни пензионовац и скорей як сполня общи условия за старосну пензию, та до пензиї годни пойсц и полицає котри робели на специфичних и оперативних роботох.