ШИД – Подпредсидателька Социялдемократскей странки (СДС) Светлана Вуйович, предсидатель Вивершного одбору странки Ґоран Боґданович и шеф посланїцкей ґрупи СДС у Народней скупштини Марко Дюришич вчера нащивели Општински одбор СДС у Шидзе, дзе бешедовали з руководительством и членми странки.
Ґоран Боґданович гварел же пред дзешец днями основани вецей општински и городски одбори СДС, медзи нїма и у Шидзе, а наступни днї буду основани ище 30 у цалей Сербиї, з хторих 12 у Войводини.
Светлана Вуйович гварела же СДС щира опозицийна странка, нє у власци є и прето критикує тото цо нє добре, а потримує цо добре за интереси гражданох.
Марко Дюришич як вельку спокусу акцентовал худобство и нєзанятосц гражданох, насампредз младих од 18 до 24 роки и додал же инвестициї и роботни места принєшу лєпши живот гражданом и держави.