ВЕРБАС – Всоботу, 28. новембра, у нововербаскей грекокатолїцкей парохиї св. Владимира орґанизована вистава з нагоди 150-рочнїци народзеня митрополита Андрея Шептицкого, а на пригодней шветочносци присуствовали и амбасадор України у Сербиї Олександар Александрович, амбасадор Пакистану у Сербиї Ариф Махмуд, наш апостолски еґзарх владика Георгий Джуджар, членїца Општинскей ради Вербас Йована Вуйтович, як и нашо священїки – о. Роман Миз, о. Михайло Малацко, о. Юлиян Рац, о. Виталий Лотоцки, о. Владислав Варґа, о. Алексий Гудак и домашнї парох о. Игор Вовк.
Вистава фотоґрафийох и документох з назву „Живот и дїялносц митрополита України Андрея Шептицкого” облапя архивски материял, приватни фотоґрафиї и малюнки на хторих представени церковна, медзинародно-дипломатска, просвитительска и спонзорска дїялносц митрополита Шептицкого.
На шветочносци бешедоване о живоце и дїлу митрополита Шептицкого, а у програми участвовал Хор КПД „Карпати” и квартет „Струни шерца”, Єлена Кузма читала дзепоєдни написи Шептицкого, пущени и видео-знїмок. Пред шветочносцу, у дворе парохиї була панахида.
Виставу у нашей жеми орґанизує Амбасада України у Беоґрадзе, з потримовку грекокатолїцких парохийох у Сербиї, а попри у Вербаше, будзе виложена и у Кули, Индїї, Новим Садзе и Беоґрадзе.