ЗАҐРЕБ – Всоботу, 18. юния, з пригодну програму и у Заґребу означени Дзень Руснацох Републики Горватскей, а у орґанизациї Представителя рускей националней меншини Городу Заґреб мр Ириниея Мудрия.
Швето Руснацох у главним городзе Горватскей и з тей нагоди отримане у їх просторийох у Водоводней улїчки, дзе и урядове шедзиско спомнутого представителя, а у його мено присутних привитал секретар Представителя Йоаким Павлович.
На шветочносци участвовали и Руснаци зоз Сербиї, понеже наша позната ґлумица Наташа Макаї Мудрох, котра и директорка Руского културного центру у Новим Садзе, виведла монодраму Дюру Папгаргая „Масонка, а аж з Коцура”.
У делеґациї з Войводини бул и предсидатель Националного совиту (НС) Руснацох Сербиї Славко Рац, як и дакедишнї предсидатель НС Славко Орос.
Крем монодрами, за нащивительох орґанизована и вистава акварелох „Квеце”, Владимира Провчия з Риєки, односно Матульох.
Попри Руснацох зоз Заґребу, на шветочносци присуствовали и член Совиту за национални меншини Републики Горватскей Звонко Костелник и предсидатель Координациї рускей националней меншини Републики Горватскей Борис Бучко.
По традициї, и тогорочна програма закончена зоз заєднїцким друженьом учашнїкох, нащивительох и госцох у просторе Представителя Руснацох Заґребу.