РУСКИ КЕРЕСТУР – У присустве уметнїци, у голу керестурскей Школи „Петро Кузмяк” 3. марца отворена вистава диґиталних принтох з назву „Красота задуманей жени”, младей уметнїци Кристини Ґшвенґ з Вербасу.
Госцинску привитала и виставу отворела педаґоґиня у Школи Любица Няради, наглашуюци же вистава отворена и з нагоди наиходзацого швета женох, 8. марца. Тиж є и у рамикох проєкту Професийней ориєнтациї за школярох закончуюцих класох основней школи и матурантох штреднєй школи.
Попри тим же ше упознали з професию инженєра веб-дизайну, школяром приблїжена сучасна уметносц, односно поп-арт. Вистава „Красота задуманей жени” єден час будзе виложена у школским голу, так же ю можу опатриц шицки заинтересовани жителє Керестура.
З нагоди 8. марца, у Школи отримани и креативни роботнї за школярох нїзших класох, з учительку Веруну Медєши. Дзеци на роботнї вирабяли рижни прикраски як дарунки за тото швето.
