Вистави були одкрице за ширшу явносц

автор маф, фото вев
1.3k Опатрене

РУСКИ КЕРЕСТУР – У рамикох Централней шветочносци Националного швета Руснацох по Архиєрейскей Литурґиї у просториї над владическу крипту Катедралней церкви отворени вистави „12 пошвецени” – портрети священїкох керестурскей парохиї и „Керестурски ведути” – малюнки зоз Подобовей колониї „Няради”.

Вистави у мено орґанизатора Завода за културу войводянских Руснацох, представела директорка Анамария Ранкович, а з пригоднима словами их отворела Ирина Гарди Ковачевич хтора и рецензентка виставох, чий концепт обдумала Олґа Карлаварис.

Як визначела Гарди Ковачевичова, портрети священїкох керестурскей парохиї одкрице за ширшу руску явносц, бо попри историйно-церковней, особи на портретох маю и важну национално-културну значносц, а сами портрети и уметнїцку вредносц, гоч нє одгаднути мена шицких авторох.

Так вельке число нащивительох вистави могло видзиц портрети трох владикох – кир Дионизия Нярадия, кир Йоакима Сеґедия и кир Гавриїла Букатку, як и парохох и капеланох о. Дюру Биндаса, о. Михайла Мудрия хтори з владиком Нярадийом, пред 100 роками були и иницияторе снованя Руского народного просвитного дружтва, потим о. Янка Копчая, о. Янка Ґвожджака, о. Янка Санича, о. Андрия Лабоша, о. др Гавриїла Костельника, о. Михайла Фирака и о. Михайла Макая.

З богатей колекциї малюнкох з Подобовей колониї „Няради”, хтора ше у Керестуре отримовала од 1997–2016. рок, на виставу „Керестурски ведути” директор Колониї Владо Няради уступел дїла осем авторох – Боґумила Карлавариса зоз Горватскей, Штефици Радованов зоз Сримскей Митровици, Милича Станковича – Милича од Мачви з Беоґраду, Иґора Душечкина з України, Чен Ли Фана з Китаю, Влади Нярадия з Вербасу, Снежани Влаткович з Босни и Герцеґовини, Лїляни Дєрович зоз Суботици и Дарка Ґавриловича з Краґуєвцу.

Вецей фотоґрафиї зоз  вистави мож поопатрац у нашей фотоґалериї.

ПОВЯЗАНИ ТЕКСТИ