Гоч уж конєц новембра, у новоораховским хотаре єст ище вше надосц роботи, хтори пожня пре части дижджи. По першу половку октобра хвиля ишла на руку парастом – диждж нє падал, алє влаги було у жеми, так же условия за єшеньски роботи були идеални. Нажаль, у другей половки октобра, та и у новембру, хвиля ше часто меняла, було надосц дижджу и роботи ше часто претарговало и по даскельо днї. Шицко то уплївовало и на (нє)почитованє оптималних терминох за успишну продукцию.
Штреднє патрено, у новоораховским хотаре ше зашати поверхносци под житом зменшує каждого року. Заш лєм, Золтан Фаркаш, руководитель одкупней станїци „Либела продукт”, гвари же вони и того року маю законтрачени поверхносци под житом як и прешлого року.
– Гоч зме вишли з оптималного термину за шатву жита, нашо кооперанти хасную кажди вигодни дзень за пририхтованє жеми, такой шею и кед же хвиля потрима, за даскельо днї шицко порихтане нашенє будзе у жеми.
Ендре Шереш гвари же ше йому поспишело того року пошац начас.
– Зашал сом векшу поверхносц ярцу и єден гольт жита, хторого нє шеєм уж вецей роки прето же нє ма цену, одкуп барз нєсиґурни, а и потребне векше укладанє як до ярцу. Понеже мам надосц статку, ярец и тот гольт жита похаснуєм за покарму.
Роками робим зоз жему и тримам статок. Вираховал сом ше же ше ми так найбаржей виплаци. По дзешати октобер сом пошал цо заплановане, а и кукурицу сом виламал. Правда, дакус ше одцагло пре хвилю, алє є у чардаку, а кукуричанка тиж попресована. Тераз вивожим гной кельо го єст и заорем, з тим же тей єшенї оранїна барз подло випатра, понеже було досц паданя, парцели поґажени и жем ше нє розтреса. Ярнєй оранїни будзем мац шейсц гольти. Барз ше ридко случує же охабим оранє за яр, алє того року нє мам досц гною, та так випадло – потолковал Ендре.
По його словох, понеже ма вельо рогатого статку, опредзелєл ше за продукованє ярцу, жита, кукурици и слунечнїку и зоз другим ше нє занїма. Тиж, надпомнул же скоро шицки роботи окончи зоз фамелию, та вец и шицок заробок остава дома.
У хотаре тих дньох єст надосц польопривредни машини. Кукурици ище єст за ламанє, оре ше и пририхтує жем за шатву, шеє ше, вивожи гной, роби ше жимске оранє. Лєм най хвиля потрима.