НОВИ САД – Тих дньох вишло майске число часопису за дзеци „Заградка”, з часци пошвецена и театралним представом за дзеци на тогорочним Драмским мемориялє Петра Ризнича Дядї у Руским Керестуре, о чим и фотоґтафия на насловним боку. Друга подїя, о хторей тиж шведочи фотоґрафия на рамику, то знїманє за телевизию наградзених найвреднєйших сотруднїкох „Заградки”, школярох пиятей класи з Коцура, з їх учительку Славицу Чельовски.
Литературну часц часопису виполнєли писнї и приповедки писательох – Михайла Ковача, Агнети Бучко-Папгаргаї, Евґения М. Кочиша, Михала Симуновича и Силвестера Макая, автор драмскей слички Ґрадимир Стойкович, а ту и приповедки познатих сербских писательох.
У „Малей заградки” басна и даскельо кратки писнї за наймладших, а на бокох пошвецених школярским литературним и подобовим роботом найвецей ярнї, насампредз вельконоцни теми.
На забавних бокох єст гумору, ребуси и лавиринт и интересантни бависка з буквами, а и у новей „Заградки” читачом будзе интересантна рубрика „Вериш? Нє вериш?”.