РУСКИ КЕРЕСТУР – У керестурскей парохиї Св. оца Миколая вишло перше тогорочне число мешачного християнского часопису „Дзвони”, у хторим главна тема – Рок милосердия – обробена у вецей статьох и звитох.
У рубрики „Стереотипи” розпатрена актуална тема о виронауки у школи, а ту и актуалносци з вселенскей Церкви, док у „Слову живота” розпатрене як Бог поцешує чловека. У тим духу и шведоченє ш. Неиди о єй дїлованю у венецуеланским гарешту.
У нових „Дзвонох” и 13. предлуженє з нагоди 20 рокох Каритасу, звит з Нєдзелї Каритасу у наших парохийох, а призначени и други подїї з наших парохийох у предходним периодзе.
У рубрики „Рочнїци” здогадованє на о. Йована Храниловича, а представени и даскельо нови виданя Дружтва за руски язик, литературу и културу. Ту и податки з матрикуларних кнїжкох з наших парохийох за 2015. рок, док у додатку „Богословска думка” штварте предлуженє написох о Святим року и о Св. тайни священства.
На початку рока редакция часопису „Дзвони” поволує стаємних читачох, як и нових предплатнїкох, же би з рочну предплату, хтора 800 динари, потримали його виходзенє.