РУСКИ КЕРЕСТУР – У рускокерестурскей парохиї св. Миколая тих дньох вишло двочисло, юлийско-авґустовске виданє Християнского часопису „Дзвони” котре з векшого пошвецене означеним подїйох по наших парохийох, алє ту и други змисти.
„Дзвони” приноша звит зоз преслави Завитного дня у керестурскей Водици, потим зоз промоциї преложеного Святого писма на руски язик, авторох Михала Рамача и др Янка Рамача у Новим Садзе.
На бокох рубрики „Дожица” ше находзи напис о Сримских дожицох, а ту и призначена подїя пошвецаня венчикох у сримскей парохиї на швето Яна.
У тим виданю и шесте предлуженє написа Ґу 100-рочнїци РНПД-а, як и приповедка о Мариї Шимковей.
Кед слово о рочнїцох, „Дзвони” пишу о означованю 20. рочнїци пришаги членох Церковного одбору рускокерестурскей парохиї св. оца Миколая. У рубрики „Памятки” ше закончує напис Памятки зоз давного Керестура зоз його шестим предлуженьом, а ту и приповедка о Бачикови дзвонарови.
И тото число „Дзвонох” видруковане цале у фарбох и на квалитетним паперу, а мож го купиц у шицких наших парохийох.