НОВИ САД – Войводянски општини Кула, Ковин и Оджак достали безповратни средства за софинансованє набавки по єден нови камион за зберанє и одвоженє комуналного шмеца, у рамикох конкурсу Покраїнского секретарияту за урбанизем и защиту животного штредку.
Контракти вредносци 60 милиони динари, пияток 10. юлия, зоз представнїцами локалних самоуправох подписала помоцнїца покраїнского секретара за урбанизем и защиту животного штредку Єлена Шаренац, хтора визначела же конкурс часц заєднїцкого опредзелєня за злєпшанє системох управяня зоз шмецом, защиту животного штредку и обезпечованє квалитетнєйших условийох за живот гражданох у Войводини.
Вона поручела же явни конкурс бул розписани у юнию, а максимална сума по єдней прияви була 20 милиони динари и додала же на тот завод потримани три войводянски општини, а же ше у наиходзацим периодзе буду глєдац додатни средства и за други локални самоуправи у АП Войводини.
Представнїки локалних самоуправох визначели же тота потримовка допринєше ефикаснєйшому збераню и одвоженю комуналного шмеца, цо гражданом и їх штредком обезпечи лєпши квалитет живота, наводзи ше у сообщеню Покраїнскей влади.