РУСКИ КЕРЕСТУР – Як почало лєто, и период лєтних одпочивкох, вечарами на улїчкох обачлїве же єст вецей людзох, старших котри шедза зоз сушедством, дзеци котри ше бавя, и цали дружтва котри печу сланїну, праве як цо то дакеди давно робели нашо старши.
Прешлого викенду, всоботу, 11. юлия сушедство на Вельким шоре у Руским Керестуре пред обисцом Барнових, предлужело уж традицийни обичай печеня сланїни на рожню.
Тей соботи на инициятиву Барнових позберали ше 15 фамелиї, та ше дружели шицки ґенерациї, од наймладших, та по пензионерох. Вшелїяк же печенє сланїни на рожню було центер збуваня того вечара за шицких, коло огня у старим валовку ше лєм зменьовал круг дзецох и старших котри нєпреривно випекали сланїнку. Правда тим наймладшим було и найинтересантнєйше котри ше дзечнє понукли та тоту роботу одробели и за старших сушедох.
Сланїну на таки способ пекли Руснаци од давна у нашим валалє, та ище и коло салашох. Надзац сланїнку на рожень, вжац фалаток хлєба и накапкац з масцу вшелїяк же окремне дожице котре треба паметац и чувац.
Так ше у валалє дружа и други сушедства, на Маковским, и на Капущаним, а подобне мож видзиц з часу на час и на базену, або у лєшику.
