РУСКИ КЕРЕСТУР – У керестурскей парохиї вчера вишло друге тогорочне число Християнского часопису „Дзвони”, у хторих главна тема одгуки историйного стретнуца папи Францизка и русийского патриярха Кирила.
О тим стретнуцу у Року милосердия, спатреним и з очми нас грекокатолїкох, пише о. Владислав Варґа, тота тема винєшена и у рубрики „Актуалносци зоз вселенскей Церкви”, як и у рубрики „Стереотипи”.
Рубрика „Духовне заренко”, з насловом „Пост то час одруцованя фалшивосци”, приноши виривки з казанї папи Францизка, а практични духовни поради за Вельки пост даваю и други интересантни статї.
Нови „Дзвони” приноша и три приклади екуменизму на дїлу у напису о. Романа Миза, а ту и рубрика „Сримски дожица”. Часопис представя и нашого священїка и иконописца о. Йосафата Гардия зоз Словениї.
Фебруарски „Дзвони” пишу и о тогорочним Шветовим стретнуцу младих з папом у Кракове, та о шицких подїйох у наших парохийох, о активносцох Каритасу, а заступени и други стаємни рубрики.