НОВИ САД – Нєшка вишло авґустовско-септемберске число МАК-у, а „У фокусу” му успишна студентка Татяна Дудаш з Кули, котра закончує мастер студиї у иножемстве, потим Иван Молнар з Дюрдьова, котри даскельо мешаци робел на Малти, як и тема о насилстве над женми.
„МАК-ов колаж” облапя збуваня за младих хтори були влєце у вецей наших местох, рубрика „Дакеди и нєшка” пише о тим хто нєшка младим идоли, а „Спорт и рекреация” представя вецей файти вежбаня у ґрупох.
„Швет технїки и технолоґиї”, медзи иншим, толкуює як на мобилни телефон зняц апликацию нашей Новинско-видавательней установи „Руске слово”, дзе мож читац и тексти обявйовани у МАК-ох.
У рубрики „Упознай себе” интересантни квиз за любительох Гария Потера, а у „Куцику совитох” дати даскельо напрямки бруцошом и будуцим студентом.
Медзи другим, у тим чишлє мож пречитац и поезию у рубрики „Власни печац”, дзе представена и Наташа Хромиш з Дюрдьова, котрей гоби фотоґрафия.
