НОВИ САД – Покраїнски секретар за културу и явне информованє Славиша Ґруїч прешлого тижня бешедовал з директорами заводох за културу Войводини о представяню шицких шейсцох заводох у Бриселу, у Белґиї, на „Отвореним дню 2015”, хтори 13. октобра будзе у просторийох Европского парламенту.
На роботней схадзки з покраїнским секретаром Ґруїчом присуствовали директоре заводох за културу войводянских Руснацох Серґей Тамаш, Горватох Томислав Жиґманов, Словацох Милина Склабински, Мадярох Мартина Гонди, Румунох Тодор Урсу и директор Заводу за културу Войводини Владимир Копицл.
Представянє шицких заводох, односно култури националних заєднїцох Войводини будзе на Округлим столє хторому домашнї будзе посланїк у Европским парламенту Едвард Кукан, а презентация будзе витворена з технїчну потримовку Канцелариї войводянского „Фонду европски роботи” у Бриселу, як и Амбасади Републики Сербиї.
Як поведзене на схадзки, представянє у Европским парламенту у Бриселу барз велька чесц и за заводи и за войводянски национални заєднїци, як и за шицки найзначнєйши покраїнски институциї. Округли стол будзе тирвац 90 минути, и за тот час заводи прикажу богатство своїх заєднїцох, алє источашнє и интеркултуралносц мултиетнїчней Войводини.
Як поведзене, презентация будзе з двох часцох – перше у кратшим, седемминутовим документарним филму будзе представена кажда меншина окреме, та з тим и Руснаци на тих просторох, з акцентом на историйно-културолоґийним приказу, а у другей часци будзе презентация активносцох самих заводох.
Попри тим, исти дзень вечар, у Амбасади Републики Сербиї у Бриселу плановане орґанизовац мултимедиялну виставу, на хторей буду заступени шицки заводи за културу у Войводини.