НОВИ САД – Прешлого тижня додзелєни контракти 153-ом польопривреднїком котрим Покраїнски секретарият за польопривреду, водопривреду и лєсарство одобрел безповратни средства за софинансованє набавки опреми за наводньованє и вибудов експлоатацийних студньох.
З тим закончени конкурс за наводньованє и експлоатацию студньох, хтори бул розписани 2014. року, а по хторим дотераз 523-ом хасновательом розподзелєни вєдно 270 милиони динари. Но, з Покраїнскей влади наявене же до конца рока безповратни средства достаню ище 150 польопривреднїки.
– З ребалансом буджету зме обезпечели дополнююци средства за наводньованє, та за войводянских польопривреднїкох на розполаганю буду ище 47 милиони динари – гварел заменїк ресорного покраїнского секретара Бранислав Кнежевич и заключел же тоти укладаня допринєсли же того року под системами за наводньованє буду ище 4 500 гектари.