КОЦУР – У рамикох Дзешатого Фестивалу гумору и сатири „Коцурска чутка” вчера вечар у Библиотеки у Коцуре представена кукурична кухарка „Златни заренка веселосци” Александра Деветка, хтору видало КПД „ДОК” и видавательна хижи „Прометей”.
О кнїжки бешедовал предсидатель КПД „ДОК” и єден з єй рецензентох проф. др Михайло Фейса, котри визначел же то штернаста кнїжка у виданю „ДОК”-у, а у тей найновшей позберани роботи хтори автор посилал на конкурски за дотерашнї „Коцурски чутки”, допольнєти з численима рецептами. Автор на промоциї бешедовал о наставаню того дїла, хторе пририхтовал три роки, пречитал и свою поезию, док Фейса пречитал и даскельо афоризми и стихи зоз кнїжки „Златни заренка веселосци”.
Кухарка видата двоязично – по сербски и руски, а попри 65 рецептох хторим основа кукурица (понеже ше автор занїма и зоз здравим костираньом), у кнїжки и Деветаково афоризми, та стихи за кухарки. Деветак сам и илустровал кухарку зоз своїма карикатурами.
Обявйованє кнїжки помогли Покраїнски секретарият за културу и явне информованє, Општина Вербас, Месна заєднїца Коцур, та „АБЦ фуд” з Руского Керестура. На концу промоциї автор шицким пристутним подзелєл по прикладнїк кухарки.
Под час промоциї у Библиотеки були виложени школярски подобово роботи хтори того року сцигли на конкурс КПД „ДОК”, з тему кукурици. Маляр Владимир Няради и проф. др Михайло Фейса под час промоциї придали награди за три прешлорочни роботи, дзе першу награду достала Бояна Васич, другу Теа Буила, а трецу Марко Буила.
После промоциї у Доме култури одбавена моно-драма „Перша малженска ноц” Миодраґа Караджича, хтору у режиї Радоя Раонича виведол Мияило Мишо Воїнович. Представа проєкт Театру младих „Владимир Попович” Културного центру з Вербасу, и коцурска публика ю добре прилапела.
Нєшка на „Коцурскей чутки на 17 г. будзе манифестация дзецох „Коцурска чуточка”, на 18 г. главна програма Фестивалу, а на 20 г. Драмски студио Руского културного центру з Нового Саду одбави представу „Круцина” Танкреда Дорста, у режиї Звонимира Павловича. Спомнути програми буду у Доме култури, а по представи, на 21,15 г. у Огньогасним доме будзе поставени кукурични етно-стол.
