НОВИ САД – У Войводини зазначене же вше векше число школярох скорей часу претаргує школованє, найчастейше пре повторйованє класи, селєнє до иножемства, лєбо звонка териториї Войводини, потим пре занєдзбаносц, ступанє до малженства и подобне, указали резултати виглєдованя хторе окончел Покраїнски секретарият за образованє, предписаня, управу и национални меншини-заєднїци, а информация розпатрана на Покраїнскей влади.
У Сербиї то перша анализа такей файти, хтора приказує тенденциї, випитує причини зменшаня числа уписаних дзецох до обовязней школскей програми, причини за претаргованє школованя на преходзе з єдного до другого ступня образованя.
У обласци основного и штреднього образованя обачене зменшанє числа школярох за 20,77 одсто, з чого 12,89 одсто штредньошколци. Причини за претаргованє штредньошколского образованя то занєдзбаносц у воспитаню, нєвигодна материялна ситуация и селєнє до иножемства.
Зазначене и же ше од школского 2012/2013. року вше менєй дзеци уписує до обовязней пририхтуюцей програми, найчастейше пре пременку места пребуваня, почежкосци у розвою дзецка, хороту, занєдзбаносц у воспитаню, социялну и материялну загроженосц.