КУЛА – Фодбалски клуб „Гайдук” з Кули дотераз шицки змаганя хтори бавел у тим городзе, бавел на стадионє хтори нїґда нє леґализовани, дознава Войводянски виглєдовацко-аналитични центер (ВОИЦЕ).
Будованє стадиону у Кули почало 1992. року, кеди видата локацийна дозвола на пейц роки. Теди поставени трибини, а вонкашня часц стадиону подзелєна на комерциялни локали од 15 до 50 квадратни метери, та су предани по 1 200 марки за квадрат, дознава ВОИЦЕ.
Медзитим, стадион дотераз нє заведзени до кнїжкох, та „Гайдук” нє ма нїяки маєток хтори би го могол виратовац з длуствох, понеже є од 2010. року у предликвидациї, а 2013. року виступел з Першей лиґи.
Предликвидацийни управнїк „Гайдуку” Любомир Суботич порушал поступок леґализациї стадиону, цо од нього вимагал судия задлужени за тот предмет у Привредним судзе у Зомборе.