НОВИ САД – Город Нови Сад цалком потримує одлуку Покраїнскей влади же би ше формовало Одбор за вибудов нового будинку Радио-телевизиї Войводини и порихтани є буц партнер у витворйованю того значного проєкту, гварел городоначалнїк Нового Саду Милош Вучевич на вчерайшей схадзки з ґенералним директором РТВ Войводини Миодраґом Копривицом.
– Город потрима проєкт и видвої часц средствох за валянє остатку обєкту на Мишелуку, односно за чисценє терену. З ребалансом городского и покраїнского буджету у септембру обезпечиме пенєж. То за тераз начални розгварки, на схадзкох Одбору шицко будзе конкретизоване, а главна идея же би Покраїна и Город були софинансиєре роботох на чисценю терену за вибудов нового будинку – гварел городоначалнїк Вучевич.
Директор РТВ Войводини Миодраґ Копривица на схадзки городоначалнїка поинформовал же терен на Мишелуку преверени и же нєт ризику од експлозивох, радияциї и подобних ризикох.