РУСКИ КЕРЕСТУР – На вчерайшей централней програми „Костельниковей єшенї” у Руским Керестуре орґанизаторе привитали и окремного госца – професора др Зорана Дєрича, визначного културного роботнїка, сербского поету, есеїсту, прекладателя и терашнього окончователя длужносци директора Сербского народного театру у Новим Садзе.
На початку вечара Дєрич перше з окремну бешеду присутних уведол до швета поезиї, дзе поняце кнїжки поровнал з домом, а дом з характеристику самого поети. О Дєричови и його стилу писаня бешедовал др Стеван Константинович, котри визначел його постмодернистични приступ и наративни стил писаня поезиї, а огляднул ше и на Дєричову богату творчосц, понеже од 1983. по 2015. рок обявел 26 авторски дїла и 27 преклади.
О найновшей кнїжки поезиї Зорана Дєрича „Чарнок”, инспированей и з археолоґийним находзиском нєдалєко од його родного Бачкого Доброго Поля, бешедовала и др Валентина Чижмар, а и сам поета пречитал два писнї з тей найновшей збирки.
