КУЛА – Вирни грекокатолїцкей парохиї св. Йосафата у Кули вчера шветочно преславели храмове швето – Кирбай, вєдно з владиком Георгийом, домашнїм парохом о. Виталийом Лотоцким и капеланом о. Платоном Салаком – монахами Василиянами.
Кирбай з домашнїма возвеличали и протоигумен монахох Василиянох зоз Словацкей о. Методий Биланчик, та священїки з наших парохийох – о. Михайло Малацко, о. Владислав Рац, о. Михайло Режак, о. Юлиян Рац. о. Алексий Гудак и о. Владимир Медєши.
Владику и протоигумена з квецом привитали виронаучни дзеци, а владика у казанї по руски, українски и сербски повинчовал Кирбай и здогаднул же мученїцка шмерц св. Йосафата за єдинство Церкви то як нашенє християнства и наглашел же єдинство, як вредносц, барз важне и у нєшкайшим чаше.
На Служби шпиванє водзели 13 шестри служебнїци котри з тей нагоди пришли до Кули зоз шицких манастирох, на чолє з провинцийну ш. Веронїку Гралюк. На концу Служби двоме паноцове мировали барз вельке число вирних, а кирбайски обход нє бул пре подлу хвилю.
Попри Архиєрейскей, на Кирбай була и Мала Служба на 8 годзин, а пред Кирбайом вечар Всеночне.