КОЦУР – Вчера у коцурскей Основней школи „Братство єдинство” отримана шветочна промоция кнїжки Весни Раґаї Цап, односно фотомоноґрафиї школи – „Два и пол вики образованя у Коцуре”.
Програма отворена з гимну „Боже правди”, хтору одшпивала Ивана Малїк и шветочну шпиванку Руснацох у Сербиї „Браца Русини”, хтору одшпивала Саня Полдруги, а на ґитари ю провадзел Михаил Рамач.
Присутних привитала директорка Школи Славица Байор, а школярки Анастазия Чордаш и Марина Тодич публику упознали з историйнима податками о образованю у Коцуре. На промоциї бешедовал и парох коцурски о. Владислав Рац, котри визначел важносц чуваня историї и податкох о образованю.
О самей фотомоноґрафиї „Два и пол вики образованя у Коцуре” бешедовала авторка Весна Раґаї Цап, котра наглашела же през фотоґрафиї приказане нє лєм образованє, алє и способ живота у Коцуре.
Рецензенти Славко Сабо, пензионовани редактор Заводу за видаванє учебнїкох и Ружица Бокан, професор анґлийского язику у пензиї, визначели же Коцурцом образованє було вше важне, цо приказане и през тоту фотомоноґрафию.
Виривки з представяней кнїжки пречитали Давид Неделькович и Марина Тодич, а програму збогацели и музични точки хтори виведли Марко Буила на гушлї и Лидия Шкорич на квалиятурох.
Фотомоноґрафию видала ОШ „Братство єдинство” з Коцура.
