Демократи внєдзелю отримали закончуюцу конвенцию

автор зам
1k Опатрене

КУЛА – У сали Културного центру у Кули внєдзелю, 17. априла, виберанкова лїстина за виберанки на локалним уровню „Сиґурно лєпше-Демократска странка (ДС), др Йован Янич” отримала закончуюцу конвенцию, на хторей представени кандидати за одборнїкох у Скупштини општини Кула, кандидати за Скупштину Войводини, а на конвенциї присуствовали и високи функционере ДС, дзепоєдни з нїх и кандидати за покраїнских и народних посланїкох – Драґан Шутановац, Небойша Новакович, Мирослав Васин, Єлена Балашевич, Милана Бодорожич и Наташа Вучкович.

Предсидатель Општинского одбору ДС Иштван Кардош на конвенциї визначел же у одношеню на предходни виберанки тераз на локалней лїстини тей странки 30 нови особи, а бешедовал и кандидат за одборнїка з Руского Керестура Борис Шайтош, котри гварел же остатнї час Керестур запущени.

Кандидат за народного посланїка ДС Драґан Шутановац у Кули бешедовал о тим же актуална власц и премиєр нє сполнєли дати обецунки, бо зменшани плаци и пензиї, подрагшела струя, зменшани аґрарни буджет и поволал гражданох най, як гварел – „нє веря телевизиї, вона ше криє у вашим фрижидеру”.

Предсидатель Покраїнского одбору ДС и кандидат за предсидателя Покраїнскей влади Мирослав Васин визначел досяги дотерашнєй роботи покраїнскей администрациї и потримал кандидатуру Лазара Ґребера за предсидателя Општини Кула, котри, попри тим же є дипл. економиста, як гварел, и шветови и европски шампион у каратеу.

На концу конвенциї бешедовал и спомнути Лазар Ґребер, котри здогаднул на побиду ДС у кулскей општини пред штирома роками и на свою роботу як предсидателя Општини по прекомпонованє власци. Ґребер визначел же терашня власц за 4 роки „нїч нє зробела, општина девастована”, же скорейша власц терашнєй зохабела опремену индустрийну зону, а нє приведла анї єдного инвеститора и наглашел же пременї два основни проблеми у кулскей општини – нєдостаток нових инвестицийох и вельки одход младих до других штредкох.

Шицки бешеднїки поволали же би гражданє на виберанкох 24. априла гласали за ДС и єй коалицийних партнерох на рижних уровньох, а на локалних виберанкох лїстина тей странки под числом 6.

ПОВЯЗАНИ ТЕКСТИ